Հրայր Թովմասյանն ընդունել է ԻԻՀ գլխավոր դատախազին
30/04/2013
Այսօր ՀՀ արդարադատության նախարարի պաշտոնակատար Հրայր Թովմասյանն ընդունեց Իրանի Իսլամական Հանրապետության գլխավոր դատախազ Ղոլամհոսեյն Մոհսենի Էժեիի գլխավորած պատվիրակությանը:
ՀՀ գլխավոր դատախազի հրավերով Հայաստան կատարած այցի ընթացքում ԻՀՀ պատվիրակությունը քննարկելու է հայ-իրանական համագործակցության փոխադարձ կարևորության հարցեր:
Արդարադատության նախարարությունում հանդիպման ընթացքում հյուրերի խնդրանքով նախարարի պաշտոնակատար Հրայր Թովմասյանը նախ ներկայացրեց իր ղեկավարած գերատեսչության գործառույթներն ու լիազորությունների հիմնական ուղղությունները: Կողմերն անդրադարձան նաև ՀՀ ԱՆ քրեկատարողական հիմնարկում պահվող իրանցի դատապարտյալներին հայրենիք փոխանցելու հարցերին:
2012 թվականի նոյեմբերին ԻԻՀ կատարած պաշտոնական այցի ընթացքում ՀՀ արդարադատության նախարար Հրայր Թովմասյանի և ԻԻՀ արդարադատության նախարարի միջև դատապարտյալների փոխանցման մասին համաձայնագիր է ստորագրվել, թեև մինչ այդ ՀՀ հանրապետության բարի կամքի դրսևորմաբ մի քանի փուլով իրանցի դատապարտյալներ են փոխանցվել Իրանի Իսլամական Հանրապետություն:
Գնահատելով հայ-իրանական համագործակցությունը ԻԻՀ գլխավոր դատախազը վստահեցրեց, որ Հայաստանի Հանրապետությունում ԻԻՀ դեսպանատան ակտիվ մասնակցությամբ էլ ավելի կզարգացնեն համագործակցությունը, հնարավոր է նաև փորձի երկուստեք հետաքրքրության փոխանակում:
Օրվա երկրորդ կեսին ԻԻՀ պատվիրակության անդամներն այցելեցին ՀՀ ԱՆ «Վարդաշեն» քրեակատարողական հիմնարկ՝ հանդիպելու իրանցի դատապարտյալներին: