Մեկնարկել է ԱՊՀ մասնակից պետությունների արդարադատության նախարարների խորհրդի 8–րդ նիստը
10/10/2013
Երևանում հոկտեմբերի 10-ին մեկնարկել է ՀՀ արդարադատության նախարարության նախագահությամբ ընթացող ԱՊՀ մասնակից պետությունների արդարադատության նախարարների խորհրդի 8-րդ երկօրյա նիստը` Խորհրդի պատասխանատու քարտուղարի, Ռուսաստանի Դաշնության, Բելառուսի, Ղրղզստանի և Տաջիկստանի արդարադատության նախարարությունների պատվիրակությունների մասնակցությամբ: Պատվիրակությունները ղեկավարում են տվյալ երկրների արդարադատության նախարարները:
Հոկտեմբերի 11–ին շարունակվող նիստը կղեկավարի ԱՊՀ մասնակից պետությունների արդարադատության նախարարների խորհրդի նախագահ ՀՀ արդարադատության նախարար Հրայր Թովմասյանը:
Նիստում քննարկվելու են մասնակիցների համար կարևոր և առաջնային համարվող հետևյալ հարցերը՝
– ԱՊՀ արդարադատության նախարարությունների փորձը էլեկտրոնային կառավարման համակարգի ներդրման և զարգացման գործում. էլեկտրոնային գրանցում, էլեկտրոնային նոտարիատ, էլեկտրոնային ՔԿԱԳ,
– Չճանաչված կազմավորումների և պետությունների ընդունած փաստաթղթերը. ԱՊՀ մասնակից պետությունների փորձը դրանց ճանաչման և կիրառման հարցում,
– Ռիելտորական գործունեություն իրականացնող կազմակերպությունների լիցենզավորման կարգը՝ որպես անշարժ գույքի հետ կապված գործարքների ժամանակ քաղաքացիների իրավունքների և օրինական շահերի պաշտպանության միջոց,
–ԱՊՀ մասնակից պետությունների արդարադատության նախարարների խորհրդի 2013-2017թթ. աշխատանքային ծրագիրը։
Քննարկվելու են նաև ԱՊՀ մասնակից պետությունների արդարադատության նախարարների խորհրդի հերթական նիստին առնչվող այլ հարցեր:
2012թ. սեպտեմբերի 19-22-ը Բելառուսի մայրաքաղաք Մինսկում տեղի ունեցած ԱՊՀ անդամ պետությունների արդարադատության նախարարների խորհրդի հերթական 7-րդ նստաշրջանի աշխատանքների ավարտին որոշվել է 2013թ-ին 8-րդ հերթական նիստն անցկացնել Հայաստանի Հանրապետությունում, իսկ ԱՊՀ արդարադատության նախարարների խորհրդի նախագահ է ընտրվել ՀՀ արդարադատության նախարար Հրայր Թովմասյանը: