ԱՊՀ մասնակից պետությունների արդարադատության նախարարների խորհրդի 8–րդ նիստը
11/10/2013
Ս.թ. հոկտեմբերի 10-11-ը ՀՀ արդարադատության նախարարության նախագահությամբ անցկացվեց ԱՊՀ մասնակից պետությունների արդարադատության նախարարների խորհրդի 8-րդ նիստը` Խորհրդի պատասխանատու քարտուղարի, Ռուսաստանի Դաշնության, Բելառուսիայի, Ղրղզստանի և Տաջիկստանի արդարադատության նախարարությունների պատվիրակությունների մասնակցությամբ:
Նիստը նախագահում էր ԱՊՀ մասնակից պետությունների արդարադատության նախարարների խորհրդի նախագահ ՀՀ արդարադատության նախարար Հրայր Թովմասյանը:Նիստում քննարկվել են մասնակիցների համար կարևոր և առաջնային համարվող հետևյալ հարցերը՝
- ԱՊՀ արդարադատության նախարարությունների փորձը էլեկտրոնային կառավարման համակարգի ներդրման և զարգացման գործում. էլեկտրոնային գրանցում, էլեկտրոնային նոտարիատ, էլեկտրոնային ՔԿԱԳ,
- Ռիելտորական գործունեություն իրականացնող կազմակերպությունների լիցենզավորման կարգը՝ որպես անշարժ գույքի հետ կապված գործարքների ժամանակ քաղաքացիների իրավունքների և օրինական շահերի պաշտպանության միջոց,
- Չճանաչված կազմավորումների և պետությունների ընդունած փաստաթղթերը. ԱՊՀ մասնակից պետությունների փորձը դրանց ճանաչման և կիրառման հարցում,
Որպես կանոն, նախագահող երկիրն ունենում է հարցերի քննարկման շրջանակը որոշելու նախապատվություն:
Օգտվելով ընձեռնված հնարավորությունից՝ ՀՀ արդարադատության նախարարությունը քննարկման առարկա էր դարձրել երկու կարևոր հարց, որոնցից մեկը չճանաչված պետությունների կողմից փաստաթղթերի ճանաչումն է անդամ երկրների կողմից: Մենք ունենք այդ խնդիրը ԼՂՀ–ի իշխանությունների կողմից տարբեր փաստաթղթերի տրման հետ կապված, որոնք հետագայում ներկայացվելու են անդամ երկրներին: Դրանք են՝ ծննդյան վկայականները, մահվան, ամուսնության և մի շարք այլ փաստաթղթեր, որոնք երբեմն խնդիրներ են առաջացնում այդ երկրների կողմից: Քննարկման ընթացքում առաջարկություն է ներկայացրել ստեղծել աշխատանքային խումբ, որը կմշակի համաձայնագիր, հետագայում համաձայնագիրը ստորագրելու պարագայում խնդրին կտրվի լուծում: Նիստի մասնակիցները որոշեցին ի գիտություն ընդունել ՀՀ արդարադատության նախարարի ներկայացրած առաջարկը:
Նիստում ընդունվեց նաև որոշում՝ հաշվի առնել ԱՊՀ մասնակից պետություններում էլեկտրոնային կառավարության համակարգի. էլեկտրոնային նոտարիատի, էլեկտրոնային ՔԿԱԳ ծառայությունների ներդրման փորձը:
Որոշվեց նաև հաստատել ԱՊՀ մասնակից պետությունների արդարադատության նախարարությունների խորհրդի 2014-2018թթ. աշխատանքային ծրագիրը:
Հոկտեմբերի 11-ի նիստի ավարտին մասնակիցների որոշմամբ ԱՊՀ մասնակից պետությունների արդարադատության նախարարությունների խորհրդի նախագահող ընտրվեց ՌԴ արդարադատության նախարար Ա.Վ.Կանավալովը:
Հաջորդ՝ 9-րդ նիստն անցկացվելու է 2014 թվականի հունիսին Սանկտ Պետերբուրգում:
Լուսանկարները՝ panarmenian.net-ի
