Մրցույթ՝ «Էլեկտրոնային դատարան» համակարգի վարչական գործերով էլեկտրոնային մոդուլի մշակման խորհրդատվական ծառայությունների ձեռքբերման համար

Պայմանավորված հասարակական հարաբերությունների առաջընթացով, դրանց շրջանակում թվային տեխնոլոգիաների ներդրմամբ և լայնորեն կիրառմամբ՝ օբյեկտիվորեն առաջ է գալիս նաև այդպիսի տեխնոլոգիաների և դրանցով պայմանավորված լուծումների օգտագործման անհրաժեշտություն հանրային կառավարման, այդ թվում` արդարադատության իրականացման համակարգի համատեքստում:

Վերը նշվածից ելնելով, ինչպես նաև ՀՀ դատական և իրավական բարեփոխումների 2022-2026 թթ. ռազմավարության շրջանակում վարչական դատավարության գործընթացների թվայնացման նպատակ հետապնդելով՝ Հայաստանի Հանրապետության արդարադատության նախարարությունը հայտարարում է՝ «Էլեկտրոնային դատարան» համակարգի վարչական գործերով էլեկտրոնային մոդուլի մշակման խորհրդատվական ծառայությունների ձեռքբերման մրցույթ:

Վարչական դատավարության թվային մոդուլի ներդրմամբ ակնկալվում է․

1. Վարչական գործն առավել սեղմ ժամկետում և արդյունավետ քննելուն ուղղված գործիքակազմի մշակում,

2. Դատական համակարգի աշխատակիցների, դատավորների վերապատրաստում,

3. Հանրային իրազեկվածության բարձրացմանն ուղղված նյութերի և ուղեցույցների պատրաստում,

4. Յուրաքանչյուր գործով գործողությունների պատմության դիտման հնարավորության ապահովում,

5. էլեկտրոնային արդարադատության միասնական համակարգի վարչական գործերով էլեկտրոնային մոդուլի գործարկում՝ ապահովելով վարչական դատավարության թվայնացումը:

Նախատեսվում է, որ համակարգից օգտվելու են դատավորները, դատական համակարգի այլ ներկայացուցիչները, պետական բոլոր մարմինները, փաստաբանները, ինչպես նաև քաղաքացիները: Համակարգի գործարկմամբ էականորեն կկրճատվեն վարչական գործերի քննության ժամկետները՝ ապահովելով քաղաքացիների արդար դատաքննության իրավունքի պատշաճ ապահովման առավել ճկուն մեխանիզմներ:

Արդարադատության նախարարությունը հրավիրում է բոլոր՝ առաջատար տեխնոլոգիաների ոլորտում մասնագիտացած ընկերություններին մասնակցելու ՀՀԱՆ-ԲՄԽԾՁԲ-23/26 ծածկագրով գնման գործընթացին: Հրավերը հրապարակված է www.procurement.am հասցեով գործող գնումների պաշտոնական տեղեկագրում՝ հայերեն և ռուսերեն լեզուներով:

Ծածկագիր՝  ՀՀԱՆ-ԲՄԽԾՁԲ-23/26

Հղում՝ http://www.armeps.am/epps/cft/prepareViewCfTWS.do?resourceId=9349712

Հայտերի ընդունման վերջնաժամկետ՝ 22 մայիսի 2023 թ., ժամը 11:00

Մանրամասներ.

Մասնակիցը պետք է ունենա կնքվելիք պայմանագրով նախատեսված պարտավորությունների կատարման համար պահանջվող`

1) մասնագիտական փորձառություն,

2) աշխատանքային ռեսուրսներ,

3) ֆինանսական միջոցներ,

Մասնակցի որակավորումները և փորձը պետք է համապատասխանեն ստորև ներկայացված նվազագույն պահանջներին.

• Ծրագրային ապահովման մշակման առնվազն 10 տարվա մասնագիտացում,

• Առցանց էլեկտրոնային կառավարման համակարգերի մշակման առնվազն 5 տարվա փորձ,

• 2018-2023 թթ.-ի ընթացքում համանման բնույթի (այն է՝ էլեկտրոնային կառավարման բազմաշահառու համակարգերի) և հանրագումարով, ներկայացված գնառաջարկի կրկնապատիկին համապատասխանող բյուջեի չափով, հաջողությամբ իրականացված պայմանագրերի առկայություն (նվազագույնը 2 պայմանագիր),

• Ունենա սերտիֆիկացում ISO 27001 և ISO 9001 ստանդարտներով:

Պահանջվող արդյունքներին հասնելու համար Կատարողը պետք է ունենա մասնագետների թիմ:

Բոլոր փորձագետները պետք է լինեն անկախ և զերծ լինեն շահերի բախումից իրենց կողմից ստանձնած պարտականությունների ընթացքում:

Առաջարկվող փորձագետների բնութագրերը պետք է ներկայացվեն Պատվիրատուին:

Ընտրված մասնակից է ճանաչվում այն մասնակիցը, որի Աշխատանքային ռեսուրսների (ԱՌՄ), մասնագիտական փարձառության (ՄՓՄ) և ֆինանսական միջոցների (ՖՄՄ) գնահատականնների հանրագումարն ամենաբարձրն է,

Մասնակցի հայտի գնահատման բանաձև՝

ՄՀԳ = ՄՓՄ + ԱՌՄ + ՖՄՄ: