Թեստային առաջադրանքի նմուշային հարցեր

Թեստային առաջադրանքի նմուշային հարցեր

Թեստային առաջադրանքները կարող են պարունակել «Հաշտարարության մասին» ՀՀ օրենքից և վերաբերելի ենթաօրենսդրական ակտերից, ՀՀ քաղաքացիական դատավարության օրենսգրքից և ՀՀ ընտանեկան օրենսգրքից հաշտարարությանն առնչվող կարգավորումների վերաբերյալ հարցեր:       

1․ Հաշտարարությունը գործընթաց է.

• որն ուղղված է կողմերի համաձայնությամբ իրենց միջև առկա վեճն անկողմնակալ երրորդ անձի՝ հաշտարարի օգնությամբ հաշտությամբ լուծելուն.

• որն ուղղված է կողմերի միջև առկա վեճն անկախ կողմերի համաձայնությունից անկողմնակալ երրորդ անձի՝ հաշտարարի կողմից լուծելուն.

• որտեղ կողմերից մեկի համաձայնության առկայությունը բավարար է գործի ելքը Հաշտարարի կողմից որոշելու համար․

• որի արդյունքներով Հաշտարարը կայացնում է կողմերի համար պարտադիր որոշում․

2. Կարող է արդյոք վեճը հանձնվել դատարանի քննությանը, եթե կողմերի միջև առկա է հաշտարարության վերաբերյալ համաձայնության.

• այո, վեճը կարող է հանձնվել դատարանի քննությանը հաշտարարությունն ավարտելուց հետո.

• ոչ, վեճը չի կարող հանձնվել դատարանի քննությանը և ենթակա է լուծման բացառապես հաշտարարության միջոցով.

• այո, վեճը կարող է հանձնվել դատարանի քննությանը հաշտարարությունն ավարտելուց հետո, եթե Հաշտարարը գրավոր համաձայնություն է տալիս.

3. Ակտիվլսելնօգնում է.

• Կողմերին ամրապնդել իրենց դիրքերն ու փաստարկները.

• Կողմերին ավելի լավ հասկանալ միմյանց տեսակետը.

• Հաշտարարին գործի իրավական էության վերաբերյալ արդարացի դատողություն անել.

• Հաշտարարին վեճի վերաբերյալ կայացնել արդարացի որոշում.

4. Հաշտարարն իրավունք ունի.

   • հաշտարարության ընթացքում հանդիպումներ կազմակերպելու ինչպես հաշտարարության բոլոր կողմերի հետ միաժամանակ, այնպես էլ հաշտարարության յուրաքանչյուր կողմի հետ առանձին.

   • հաշտարարության ընթացքում հանդիպումներ կազմակերպելու միայն հաշտարարության բոլոր կողմերի հետ միաժամանակ․

   • հաշտարարության ընթացքում հանդիպումներ կազմակերպելու միայն հաշտարարության յուրաքանչյուր կողմի հետ առանձին.

5. Կողմի հետ փոխկապակցված հաշտարար չի համարվում.

• կողմի կանոնադրական կապիտալի մինչև 5 տոկոսին տիրապետող անձը.

• կողմի կառավարման մարմնի ղեկավարը.

• կողմի տնօրենների խորհրդի (դիտորդ խորհրդի) անդամը․

• կողմի գլխավոր հաշվապահը.

6. Նշվածներից ո՞րը չի համարվում Հաշտարարության գործընթացի ավարտվելու հիմք.

• ֆիզիկական անձ կողմերից մեկի՝ երկրից մեկ ամսից ավել բացակայելը․

• ֆիզիկական անձ կողմերից մեկի մահը․

• ֆիզիկական անձ կողմերից մեկին դատարանի՝ օրինական ուժի մեջ մտած վճռով մահացած ճանաչվելը․

• իրավաբանական անձ կողմի լուծարումը․

ԻՐԱՎԻՃԱԿԱՅԻՆ ԽՆԴՐԻ ՆՄՈՒՇԱՅԻՆ ՕՐԻՆԱԿ

Դուք հաշտարար եք և պետք է անցկացնեք ամուսիններ Միրա Դրեյֆուսի և Մհեր Կարապետյանի հանդիպումը, ովքեր հինգ տարի համատեղ ապրելուց կոնֆլիկտային իրավիճակում են հայտնվել և որոշել են ամուսնալուծվել։ Կոնֆլիկտը կողմերի միջև առաջացել է, երբ Մհերի ծնողները, առողջական խնդիրներից ելնելով, տեղափոխվել են ապրելու զույգի հետ նույն տանը, իսկ Միրան չի խնամել նրանց, ինչը վերջիններիս կողմից ընկալվել է որպես բացահայտ արհամարհանք։

Թեև հաշտարարության նիստին հրավիրվել են միայն երկու ամուսինները, անսպասելիորեն հաշտարարության հանդիպմանը Միրա Դրեյֆուսի հետ ներկայացել է նրա քույրը, իսկ Մհեր Կարապետյանի հետ ներկայացել են նրա ծնողները։ Ներգրավված ընտանիքներն ունեն գերմանական և հայկական ծագում, ինչը կարող է ազդել ընտանեկան վեճերում նրանց տեսակետների վրա: Նրանք բոլորը պնդում են, որ պետք է մասնակցեն հանդիպմանը։ Զույգը կարծես թե ճնշված է, բայց դեմ չէ իրենց ընտանիքի անդամների ներկայությանը:

Նախքան այս նիստը, Մհերի հետ նախնական հանդիպման ընթացքում նա հայտնել էր, որ շատ զարմացած է Միրայի պահվածքով, և իր կնոջից ակնկալում էր հարգանք և հոգատարություն իր ծնողների նկատմամբ, քանի որ ինքը միշտ իր կնոջ կողքին է եղել և օժանդակել է ամեն հարցում։ Մհերը նաև նշել էր, որ ինքը ունի բավարար միջոցներ ծնողներին կողմնակի խնամքը ֆինանսավորելու համար, սակայն վիրավորված է Միրայի անտարբերությամբ, հատկապես այն բանից հետո, երբ վերջինս հայտարարել է, որ խնամքն իր պարտականությունների մեջ չի մտնում։ 

Այս նիստի ժամանակ դուք նաև հիշում եք, որ Մհերը ձեր հետ միևնույն դպրոցում է սովորել և շուրջ 5 տարի եղել է ձեր դասընկերը։

Նախքան այս նիստը, Միրայի հետ նախնական հանդիպման ընթացքում, նա նշել էր, որ գնահատում և հարգում է իր ամուսնու ծնողներին և վերջիններիս չխնամելու պատճառն այն է, որ ինքը, վերջերս աշխատավայրում իրականացված ռոտացիայի արդյունքում, նոր և առավել բարդ ծրագրերի վրա է աշխատում և աշխատանքային ծանրաբեռնվածությամբ պայմանավորված շատ հոգնած է լինում, այն աստիճան, որ անգամ այս փոփոխության մասին չի հասցրել խոսել ամուսնու հետ։ Բացի այդ, Միրան նշել էր, որ ինքը անգամ չէր պատկերացնում, որ իրենից ակնկալվում է խնամքի ցուցաբերում, այլապես կփորձեր ինչ որ կերպ համատեղել դա աշխատանքի հետ, քանի որ չի ցանկանում վիրավորել ամուսնուն և նրա ծնողներին։ Նա նաև նշել էր, որ այս մասին կիսվել է քրոջ հետ, ով աշխատում է նույն գործատուի մոտ և տեղյակ է ռոտացիայով պայմանավորված իր ծանրաբեռնվածության մասին ու բացի այդ Միրայի քույրը կարծում է, որ ամուսնու ծնողների խնամքով զբաղվելը Միրայի պարտականությունների մեջ չի մտնում։

Հարցադրում 1. Հնարավո՞ր է  արդյոք այս գործով հաշտարարություն անել։ Ինչո՞ւ։ Ո՞րն է այս գործով հաշտարարության գործընթացի թեման: Այս գործով կա արդյոք Հաշտարարի՝ կողմի հետ փոխկապակցվածության խնդիր: Ինչո՞ւ:  Ինչպե՞ս պետք է վարվի հաշտարարը, երբ պարզում է, որ Մհերն իր դասընկերն է եղել։

Հարցադրում 2. Դուք արդյոք կորոշեք հանդիպումը անցկացնել բոլորի մասնակցությամբ, թե՞ միայն զույգի մասնակցությամբ։ Ինչո՞ւ: Եթե երկու կողմերն էլ համաձայնեն, հաշտարարության գործընթացին թույլ կտա՞ք  Միրայի քրոջը և Մհերի ծնողների մասնակցությունը։ Ինչո՞ւ և ե՞րբ։ Կկիսվե՞ք կողմերի հետ Ձեր դիտարկումներով, թե ինչի շուրջ է վեճը: Ձեր կարծիքով որո՞նք են այս գործում կողմերի իրական մտահոգությունները։ Կխրախուսե՞ք կողմերին կիսվել, թե որոնք են իրենց իրական մտահոգությունները: Ինչպե՞ս դա կօգնի: Որո՞նք են այս գործում Կողմերի ընդհանուր շահերը: