«Ցմահ դատապարտվածների խնդիրը նաև քաղաքական հարց է». Irates.am
27/03/2015
«Իրատես»-ը հաճախ է անդրադառնում ազատազրկվածների խնդիրներին, այդ թվում՝ սննդի, բանտախցերի պայմանների, վաղաժամկետ ազատման հարցերին: Վերջերս ՀՀ նախագահին բաց նամակով դիմել էր կալանավորվածներից մեկի կինը` ներկայացնելով «Արմավիր» ՔԿՀ-ի պայմանները: Արդարադատության նախարար ՀՈՎՀԱՆՆԵՍ ՄԱՆՈՒԿՅԱՆԻՆայս առնչությամբ մի քանի հարց ուղղեցինք:
-Պարոն նախարար, մինչ Դուք հայտարարում եք, թե «Արմավիր» ՔԿՀ-ն կառուցվել է եվրոպական չափանիշներին համապատասխան, օրերս կալանավորներից մեկի կինը փաստել էր, որ իր հիվանդ ամուսնուն ոչ մի բժիշկ չի այցելում, քանի որ այդ կալանավայրը չունի բժիշկ, բժշկական սարքավորումներ, դեղեր: Ինչպե՞ս կբացատրեք սա:
-Մենք այդ ՔԿՀ-ում ունենք բավականին հագեցած բուժական մաս, որտեղ անգամ ատամնաբուժական սարքավորումներ կան, ինչը մյուս հիմնարկներում չկա: Այդ տեղեկություններն իրականությունից հեռու են:
-ՈՒրեմն տվյալ կալանավորին բուժօգնություն չեն ցուցաբերում: Սա ևս լուրջ հարց է:
-Ես նման բողոք չեմ ստացել: Եթե նման դիմում լինի, կզբաղվեմ դրանով: Բայց նաև քիչ է հավանական, որ ազատազրկվածին չսպասարկեն, քանի որ տեխնիկական և կադրային բոլոր անհրաժեշտ հնարավորությունները կան: Այդ հիմնարկը նախատեսված է 400 դատապարտյալի համար, և մենք փուլ առ փուլ համալրում ենք այն: Այս պահի դրությամբ այնտեղ 110 դատապարտյալ կա, ու Ձեր նշած խնդիրները երբևէ չենք արձանագրել:
-Վերջերս «Նուբարաշեն» ՔԿՀ էիք այցելել ու հանդիպել ցմահ դատապարտյալների հետ, ովքեր մեզ հետ զրույցում դժգոհեցին, թե այդպես էլ չհասկացան՝ պայմանական վաղաժամկետ ազատման հետ կապված նախարարն ինչ է անելու: Ի վերջո, այդ հարցին լուծում տրվելո՞ւ է, վերանայվելո՞ւ են նրանց դատավճիռները:
-Դա ծավալուն թեմա է, և խնդրին լուծում տալու ուղղությամբ մենք այսօր աշխատում ենք: Այս պահին պատրաստի լուծումներ չեմ կարող տալ, որովհետև դա միայն արդարադատության նախարարության լուծելիք հարցը չէ: Պետք են և՛ կառավարության, և՛ ԱԺ-ի կողմից համաձայնեցված քաղաքական լուծումներ:
-Դա զուտ քաղաքակա՞ն խնդիր է:
-Ե՛վ քաղաքական, և՛ իրավական: Նման կարևորագույն ցանկացած խնդիր նախ և առաջ քաղաքական հարցադրում է:
Հարցազրույցն ամբողջությամբ՝ սկզբնաղբյուր կայքում:
