Քննարկում՝ նվիրված կոռուպցիայի դեմ պայքարի հիմնախնդիրներին
25/11/2015
ՀՀ արդարադատության նախարար Արփինե Հովհաննիսյանի և Հայաստանում ԵՄ պատվիրակության ղեկավար, դեսպան Պյոտր Սվիտալսկիի գլխավորությամբ այսօր տեղի է ունեցել քննարկում՝ նվիրված կոռուպցիայի դեմ պայքարի հիմնախնդիրներին:
Հայաստանում ԵՄ պատվիրակության աջակցությամբ կազմակերպված հանդիպմանը մասնակցել են շահագրգիռ պետական մարմինների, միջազգային դոնոր կազմակերպությունների և հասարակական կազմակերպությունների ղեկավարներ, այլ ներկայացուցիչներ:
Արդարադատության նախարար Արփինե Հովհաննիսյանը, կարևորելով այս ձևաչափով հանդիպման անհրաժեշտությունը, հավաստիացրել է, որ Հայաստանի Հանրապետության կառավարությունն ունի անհրաժեշտ քաղաքական կամք՝ կոռուպցիայի դեմ պայքարելու համար: Նախարարը վստահեցրել է, որ ՀՀ հակակոռուպցիոն ռազմավարության և դրա իրականացման 2015-2018թթ․ միջոցառումների ծրագրի շրջանակներում արդեն իսկ իրականացվել և իրականացվում են որոշակի գործողություններ: «Մեր կողմից ձեռնարկված հակակոռուպցիոն քայլերը լինելու են շատ արագ, հաջորդական, տրամաբանական և շաղկապված»,- ասել է Արփինե Հովհաննիսյանը և ընդգծել, որ դրանց արդյունքում ՀՀ քաղաքացին շուտով կզգա հակակոռուպցիոն պայքարի դրական արդյունքները:
Հայաստանում ԵՄ պատվիրակության ղեկավար, դեսպան Պյոտր Սվիտալսկին հպարտությամբ է նշել այն փաստը, որ ԵՄ պատվիրակությունը գործուն մասնակցություն ունի Հայաստանում կոռուպցիայի դեմ պայքարում: Նրա համոզմամբ, այս պայքարում հաղթելու միակ հնարավորությունը ազգային միասնությունն է: