Դատարան հնարավոր կլինի դիմել էլեկտրոնային տարբերակով, իսկ ԴԱՀԿ գնալ էլ պետք չի լինի

Ազգային Ժողովի արտահերթ նիստում արդարադատության նախարարի առաջին տեղակալ Արթուր Հովհաննիսյանը ներկայացրեց հաջորդ օրենսդրական նախագիծը, որով փոփոխություններ են նախատեսվում Քաղաքացիական դատավարության օրենսգրքում եւ հարակից այլ օրենքներում: Այսօր արդեն առաջին ընթերցմամբ քննարկվեց Քրեական դատավարության օրենսգրքում եւ հարակից օրենքներում փոփոխություն կատարելու մասին օրենսդրական նախագիծը:

Արթուր Հովհաննիսյանը նշեց, որ նախագծի անհրաժեշտության մասին շատ է խոսվել եւ «Ելք» խմբակցության պատգամավոր Արտակ Զեյնալյանը բազմիցս է խորհրդրանում խոսել էլեկտրոնային տարբերակով դատարան դիմելու անհրաժեշտության մասին: Նախագծերի փաթեթով այդ հնարավորությունը տրվում է ե՛ւ քաղաքացիական, ե՛ւ վարչական գործերով դատարան դիմելու համար: Նախատեսվում է, որ հայցադիմում, դիմում, հայցադիմումի պատասխան, միջնորդություն եւ այլ փաստաթղթեր դատարան կարող են ներկայացնել էլեկտրոնային եղանակով, իսկ տեխնիկական հարթակն արդեն պատրաստ է: «Datalex.am» տեղեկատվական համակարգի միջոցով դա հնարավոր է իրականացնել: Այդուհանդերձ չի սահմանափակվում թղթային տարբերակով դատարան դիմելու հնարավորությունը, պարզապես էլեկտրոնային ստորագրության առկայության պայմաններում քաղաքացին կկարողանա էլեկտրոնային տարբերակով դիմել դատարան: Ընդ որում, ապացույցները անձը կներկայացնի սկանավորված տարբերակով, իսկ հետագայում դատարանը կբերի բնօրինակները, եթե դրա անհրաժեշտությունը լինի:

Արդարադատության նախարարի տեղակալը նշեց, որ ԱԺ պետաիրավական հարցերի մշտական հանձնաժողովում պատգամավոր Արտակ Զեյնալյանի ներկայացրած առաջարկն ընդունելի է իրենց համար եւ նոտարական վավերացմամբ լիազորագրով եւս կկարողանան էլեկտրոնային տարբերակով դիմել դատարան:

Հաջորդ փոփոխությունը դատական ակտի հարկադիր կատարմանն է վերաբերվում, որի դեպքում նույնպես դատարանի վճիռը էլեկտրոնային եղանակով հնարավոր կլինի հասցնել դատական ակտերի հարկադիր ծառայություն, որի պարագայում էական ժամանակ կտնտեսվի:

Սկզբնաղբյուրը ՝ http://armtimes.com/hy/article/127611