Քրեակատարողական նոր օրենսգրքի կատարելագործմանը մասնակցում են քաղաքացիական հասարակության ներկայացուցիչները
08/04/2022
Արդարադատության նախարարի տեղակալ Արփինե Սարգսյանի գլխավորությամբ այսօր՝ ապրիլի 8-ին, կայացել է Քրեակատարողական նոր օրենսգրքի նախագծի կատարելագործման խորհրդատվական խմբի առաջին նիստը: Խորհրդատվական խումբը բաղկացած է բացառապես քաղաքացիական հասարակության ներկայացուցիչներից, ինչը միտված է ապահովելու արդարադատության նախարարության և վերջիններիս միջև ավելի կառուցողական երկխոսության ամրապնդմանը:
Փոխնախարար Արփինե Սարգսյանը կարևորել է քաղաքացիական հասարակության հետ համագործակցության այս նոր մշակույթի ձևավորումը և շնորհակալության հայտնել նախարարության նախաձեռնությանն արագ արձագանքելու համար: Արդարադատության նախարարության համակարգմամբ ձևավորված խորհրդատվական խմբի աշխատանքն իր ուրույն դերակատարումն է ունենալու Քրեակատարողական նոր օրենսգրքի նախագծի կատարելագործման հարցում: Նշվել է, որ այս ձևաչափով հանդիպումները թույլ կտան քաղաքացիական հասարակության ներկայացուցիչներից ստանալ հստակ առաջարկներ և դրանք քննարկել բաց և թափանցիկ տիրույթում:
Փոխնախարար Սարգսյանը նշել է, որ խորհրդատվական խմբի հանդիպումները կրելու են շարունակական բնույթ, իսկ հերթական հանդիպումների շրջանակներում քննարկվելու են Քրեակատարողական նոր օրենսգրքի նախագծի հետագա փուլերում ներկայացվող բոլոր առաջարկները՝ տեղեկացնելով, որ օրենսգրքի նախագիծն արդեն իսկ ուղարկվել է վարչապետի աշխատակազմ:
Հանդիպման ավարտին խմբի անդամներն իրենց հերթին շնորհակալություն են հայտնել արդարադատության նախարարությանը նախաձեռնության և քաղաքացիական հասարակության ներկայացուցիչներին այսպիսի աշխատանքներում ներգրավելու պատրաստակամության համար, ինչն իրենից ներկայացնում է համագործակցության նոր որակ և մշակույթ:
