Կայացել է e-probation հարթակի պաշտոնական բացումը. ծրագիրը թույլ կտա թվայնացնել պրոբացիայի շահառուի հետ տարվող աշխատանքը

Արդարադատության նախարարի տեղակալ Արփինե Սարգսյանը մասնակցել է Պրոբացիայի ծառայության աշխատանքը թվայնացնող e-probation էլեկտրոնային կառավարման համակարգի պաշտոնական բացմանը:

Փոխնախարար Սարգսյանը բացման խոսքում նշել է, որ պրոբացիայի ինստիտուտի զարգացումը կարևոր ռազմավարական առաջնահերթություն է Կառավարության համար, և այդ համատեքստում ծառայության աշխատանքի թվայնացումը մի կողմից միտված է փաստաթղթաշրջանառության կրճատմանը, ծառայության թափանցիկ և հաշվետու գործելաոճի ապահովմանը, այլ համակարգերի հետ փոխգործակցելիության ապահովմանը, ժամանակի խնայողությանը, մյուս կողմից՝ կոռուպցիոն տարբեր ռիսկերի չեզոքացմանը:

Արփինե Սարգսյանն ընդգծել է, որ e-probation հարթակը նախարարության՝ որպես ոլորտային քաղաքականության մշակողի համար առանցքային գործիք է՝ պրոբացիայի ոլորտում վարելու ապացուցահեն, փաստահեն քաղաքականություն, քանի որ համակարգը թույլ է տալիս պրոբացիայի ծառայության աշխատանքն ունենալ թվային պատկերով, կատարել վերլուծություններ, դուրս բերել տարբեր ցուցիչներով հաշվետվություններ:

Փոխնախարար Սարգսյանը և Եվրոպայի խորհրդի երևանյան գրասենյակի ղեկավարի տեղակալ Լեյլա Ժդաննովան փոխանակվել են շնորհակալական խոսքերով՝ փաստելով, որ շուրջ երկու տարվա համատեղ աշխատանքի արդյունքում մշակվել է ՏՏ ոլորտի ժամանակակից նվաճումներին համահունչ ծրագիր:

Պաշտոնական բացման արարողության շրջանակներում ծրագիրը մշակած VXSoft ընկերության գործադիր տնօրեն Վահագն Մխիթարյանը և ընկերության ծրագրային ղեկավար Հասմիկ Ավետիսյանը ներկայացրել են e-probation համակարգի նկարագիրը՝ վերլուծելով համակարգի աշխատանքը պրոբացիայի շահառուի անձնական գործի օրինակով:

Ներկայացվել է, որ e-probation համակարգն ունի պետական մարմինների էլեկտրոնային այլ համակարգերի հետ փոխգործակցելիության լայն շրջանակ, որը թույլ կտա ինքնաշխատ եղականով գեներացնել պրոբացիայի շահառուին վերաբերող անհրաժեշտ տվյալները:
Համակարգը թույլ է տալիս պրոբացիայի շահառուի և պրոբացիայի ծառայողի կողմից տարբեր փաստաթղթերի հաստատումները կատարել համակարգի միջոցով՝ ապահովելով երկու կողմերի թվային ստորագրումները, տեղորոշելով գործողության կատարման վայրը, որը թույլ կտա խուսափել տարբեր կոռուպցիոն ռիսկերից:

Համակարգի շահագործման համար ձեռք են բերվել անհրաժեշտ սարքավորումները, այդ թվում՝ թվային ստորագրության, մատնահետքի, տեղորոշման համար:

Հանդիպմանը ներկա են եղել նաև Պրոբացիայի ծառայության պետ Գևորգ Սիմոնյանը, ԵԽ երևանյան գրասենյակի և «ԷԿԵՆԳ» ՓԲԸ-ի ներկայացուցիչները:

E-probation համակարգը մշակվել է Եվրոպայի խորհրդի աջակցությամբ իրականացվող «Աջակցություն Հայաստանում պրոբացիայի ծառայության զարգացմանը» ծրագրի շրջանակներում (ֆինանսավորումը՝ Եվրոպայի խորհրդի Հայաստանի համար 2019-2022թթ. Գործողությունների Ծրագրի):