Իրավապահ մարմինների, դատավորների և քրեակատարողական համակարգի համագործակցություն. նախարարի տեղակալ Կարեն Կարապետյանն ընդունել է Ռաուլ Վալենբերգի անվան մարդու իրավունքների և մարդասիրական իրավունքի ինստիտուտի տնօրենի գլխավորած պատվիրակությանը

Արդարադատության նախարարի տեղակալ Կարեն Կարապետյանն ընդունել է Ռաուլ Վալենբերգի անվան մարդու իրավունքների և մարդասիրական իրավունքի ինստիտուտի տնօրենի գլխավորած պատվիրակությանը:

Կարեն Կարապետյանը ողջունելով մասնակիցներին հատուկ ընդգծել է համագործակցության խորացմանն ուղղված ջանքերը՝ երկու կառույցների միջև ստորագրված համագործակցության հուշագրի շրջանակում:

Կողմերը քննարկել են Արդարադատության նախարարության և ինստիտուտի համագործակցությամբ իրականացված և առաջիկայում նախատեսվող ծրագրերը՝ մարդու իրավունքների պաշտպանության ոլորտում, ինչպես նաև բարձր են գնահատել իրավապահ մարմինների ներկայացուցիչների, դատավորների և քրեակատարողական համակարգի աշխատակիցների համար իրականացված վերապատրաստումները:

Ինստիտուտի Եվրոպայի գրասենյակի ղեկավար Զուզանա Զալանովան և արդարադատության մատչելիության բաժնի ղեկավար Ջոշ Օունսթեդը ներկայացրել են իրենց կողմից իրականացվող ծրագրերի արդյունքները և տեսլականը:

Անդրադարձ է կատարվել ինստիտուտի կողմից իրականացված իրավական ուսումնասիրություններին, «Ուժեղ ցավի տարրը խոշտանգման հասկացությունում» գործնական ուղեցույցի կիրառմանը և «Հայաստանի արդարադատության նախարարության քրեակատարողական և պրոբացիայի ծառայությունների վերապատրաստման կարիքները» վերտառությամբ քարտեզագրման զեկույցին, ինչպես նաև դրանցով նախանշված համագործակցության հնարավոր ուղղություններին:

Կողմերը պայմանավորվել են աշխատանքի արդյունավետությունն ապահովելու համար անցկացնել աշխատանքային քննարկումներ և կարիքների գնահատում, որոնց հիման վրա կիրականացվեն նախանշված ծրագրերը: