Մասնավոր հատվածում բարեվարքության ուղղությամբ արձանագրված առաջընթացը և Հակակոռուպցիոն նոր ռազմավարության ուղղությամբ իրականացվող աշխատանքների ընթացքը ներկայացվել են միջազգային հարթակում

Արդարադատության նախարարության հակակոռուպցիոն քաղաքականության մշակման և մոնիթորինգի վարչության պետի ժամանակավոր պաշտոնակատար Հասմիկ Տիգրանյանը Վիեննայի կենտրոնակայանում ՄԱԿ-ի «Կոռուպցիայի դեմ» կոնվենցիայի անդամ երկրների Կոնվենցիայի կիրարկման վերանայման նիստին ներկայացրել է կոնվենցիայով սահմանված պարտավորությունների գնահատման շրջանակում Հայաստանի Հանրապետությանը տրված հանձնարարականների կատարման ընթացքը և դրանց ուղղությամբ արձանագրված ձեռքբերումները՝ անդրադառնալով հակակոռուպցիոն ինստիտուցիոնալ համակարգի ամրապնդմանը, բարեվարքության ստուգման մեխանիզմների շարունակական կատարելագործմանը, հակակոռուպցիոն քաղաքականության մշակման գործընթացներում ներառականության ապահովման ՀՀ գործող մեխանիզմներին:

Հակակոռուպցիոն քաղաքականության մշակման և մոնիթորինգի վարչության գլխավոր մասնագետ Տաթևիկ Խաչատրյանը մասնակցել է «Կոռուպցիայի դեմ» կոնվենցիայի անդամ երկրների Կոնվենցիայի կիրարկման վերանայման մեխանիզմի կատարելագործմանը նվիրված քննարկմանը, ներկայացրել առաջարկություններ՝ կոնվենցիոն պարտավորությունների գնահատման գործընթացն առավել արդյունավետ դարձնելու նպատակով:

ՄԱԿ-ի «Կոռուպցիայի դեմ» կոնվենցիայի Կոռուպցիայի կանխարգելման Բաց կազմի միջկառավարական աշխատանքային խմբի նիստին Հասմիկ Տիգրանյանը ներկայացրել է կոռուպցիայի դեմ պայքարի շրջանակներում ֆինանսական վերահսկողական գործառույթներ իրականացնող մարմինների դերակատարման, կանխարգելման և հակակոռուպցիոն իրավապահ մարմինների միջև համագործակցության իրավական գործիքակազմի ՀՀ փորձառնությունը և նախատեսվող բարեփոխումները:

Տիգրանյանը մասնավոր հատվածում կոռուպցիայի դեմ պայքարի միջկառավարական պանելային քննարկման ընթացքում ներկայացրել է մասնավոր հատվածում բարեվարքության ուղղությամբ արձանագրված առաջընթացը և ներկայումս մշակման փուլում գնվող նոր՝ 2023-2026թթ․ հակակոռուպցիոն ռազմավարությամբ մասնավոր հատվածում կոռուպցիայի դեմ պայքարին ուղղված ռազմավարական նպատակի ներքո նախատեսվող բարեփոխումները:

Քննարկմանը ներկայացվել են նաև հակակոռուպցիոն քաղաքականության մշակման և իրականացման գործընթացներում մասնավոր հատվածի ներգրավվածության ապահովման ուղղությամբ ՀՀ կիրառվող և նախատեսվող գործիքակազմերը: Կոնվենցիայի շրջանակներում ոլորտային հասարակական կազմակերպությունների ներգրավման մեխանիզմների վերաբերյալ քննարկմանն Արդարադատության նախարության ներկայացուցիչները ներկայացրել են հակակոռուպցիոն գործընթացներին ոլորտային ՀԿ-ների ներգրավվածության ՀՀ փորձը, Հակակոռուպցիոն քաղաքականության խորհրդի և հակակոռուպցիոն աշխատանքային խմբերի գործունեությունը և ձեռքբերումները:

Վերոնշյալ հանդիպումները տեղի են ունեցել հունիսի 12-16-ը ՄԱԿ-ի «Կոռուպցիայի դեմ» կոնվենցիայի անդամ երկրների Կոնվենցիայի կիրարկման վերանայման խմբի 14-րդ և Կոռուպցիայի կանխարգելման Բաց կազմի միջկառավարական աշխատանքային խմբի 14-րդ նիստերին: