Արդիականացվում է «e-draft.am» կայքը. Նախարարի տեղակալ Արա Մկրտչյանն ընդունել է ՄԱԶԾ ներկայացուցիչներին

14/07/2023

Արդարադատության նախարարի տեղակալ Արա Մկրտչյանն ընդունել է Միավորված Ազգերի Կազմակերպության Զարգացման Ծրագրի (ՄԱԶԾ) ներկայացուցիչներին՝ Սահմանադրական բարեփոխումների ծրագրի համակարգող Աննա Հակոբյանին և Մարդու իրավունքների ծրագրի ղեկավար Մարիա Սիլավանյանին։
Հանդիպման ընթացքում քննարկվել է ՄԱԶԾ աջակցությամբ իրականացվող՝ Իրավական ակտերի նախագծերի հրապարակման միասնական «e-draft.am» կայքի արդիականացման գործընթացը:
Կողմերը բարձր են գնահատել Արդարադատության նախարարության և ՄԱԿ-ի Զարգացման Ծրագրի միջև արդյունավետ համագործակցությունը ԵՄ կողմից ֆինանսավորվող՝ «Հաշվետու հաստատություններ և մարդու իրավունքների պաշտպանությունը Հայաստանում» ծրագրի շրջանակներում:
Նախարարի տեղակալ Արա Մկրտչյանը շնորհակալություն է հայտնել «e-draft.am» կայքի՝ կարիքների գնահատում իրականացնելու և արդիականացման գործընթացին աջակցություն ցուցաբերելու համար:
ՄԱԶԾ ներկայացուցիչներն ընդգծել են «e-draft.am» կայքի դերը հանրային իրազեկվածության ապահովման համատեքստում ու վերահաստատել իրենց պատրաստակամությունը՝ կայքի արդիականացման գործընթացի ողջ ընթացքում Արդարադատության նախարարության հետ համագործակցելու և համատեղ գործընթացը համակարգելու վերաբերյալ:
Քննարկման ավարտին կողմերը հստակեցրել են ընթացիկ համագործակցության ձևաչափը և պայմանավորվածություններ ձեռք բերել արդիականացման գործընթացի համակարգման ու հետագա հանդիպումների վերաբերյալ: