Արաբական Միացյալ Էմիրությունների նորանշանակ դեսպանն անձամբ հետաքրքրված է արդարադատության ոլորտով և պատրաստ է աջակցել բարեփոխումներին. Գրիգոր Մինասյանն ընդունել է տիկին Նարիման Ալ-Մուլլային

Արդարադատության նախարար Գրիգոր Մինասյանն այսօր ընդունել է Հայաստանում Արաբական Միացյալ Էմիրությունների նորանշանակ արտակարգ և լիազոր դեսպան տիկին Նարիման Ալ-Մուլլային:

Նախարարը ողջունել է դեսպանին ու ընդգծել Արդարադատության նախարարության և ԱՄԷ-ի միջև ստեղծված ամուր գործընկերային հարաբերությունները: Գրիգոր Մինասյանը շնորհավորել է տիկին դեսպանին՝ պաշտոնի նշանակման կապակցությամբ և հույս հայտնել, որ երկուստեք կձևավորվի արդյունավետ համագործակցություն:

Տիկին դեսպանը շնորհակալություն է հայտնել ջերմ ընդունելության համար և ընդգծել, որ արդարադատության ոլորտի բարեփոխումները կարևոր դերակատարում ունեն Հայաստանի դատական համակարգի կայացման գործընթացում և նշել, որ անձամբ հետաքրքրված է արդարադատության ոլորտով ու պատրաստ է աջակցել արդարադատության ոլորտի բարեփոխումներին:

Նախարարը ներկայացրել է արդարադատության ոլորտի բարեփոխումների օրակարգը մասնավորապես, դատաիրավական ոլորտի բարեփոխումները, թվայնացման ուղղությամբ իրականացված աշխատանքներն ու Արբիտրաժային կենտրոնի ստեղծումը։ Նախարարն ընդգծել է, որ առաջիկայում Հայաստանում տեղի կունենա միջազգային արբիտրաժային կոնֆերանս, որի նպատակներից մեկն է լինելու նաև ներկայացնել Կենտրոնի դերն ու գործունեությունը բիզնես ոլորտում, ինչպես նաև ապագան ու տեսլականը: Գրիգոր Մինասյանն ընդգծել է, որ ԱՄԷ-ն ունի հարուստ փորձառություն թվայնացման, արբիտրաժային ոլորտներում և այս համատեքստում կողմերը քննարկել են փորձի փոխանակման հնարավորությունը:

Դեսպանը մեծ ուրախությամբ հայտնել է, որ իր բոլոր ջանքերը կուղղի արդարադատության ոլորտի թվայնացման և արբիտրաժային ոլորտի զարգացման ուղղությամբ:

Նախարարն ու տիկին դեսպանն համոզմունք են հայտնել, որ անհրաժեշտ է շարունակել աշխատանքներ իրականացնել Նախարարության և Արաբական Միացյալ էմիրությունների միջև ստորագրված համաձայնագրի ուղղությամբ:

Կողմերը քննարկել են նաև Փողերի լվացման և ահաբեկչության դեմ պայքարի ուղղությամբ իրականացվելիք աշխատանքները: Երկուստեք պայմանավորվածություն է ձեռք բերվել խորացնել առկա համագործակցությունը: