Արդարադատության նախարարության ղեկավար կազմը մասնակցել է ԵՄ աջակցությամբ իրականացվող կառավարման հմտությունների վերաբերյալ մասնագիտական դասընթացին
30/10/2023
Արդարադատության նախարար Գրիգոր Մինասյանի գլխավորությամբ՝ ԱՆ աշխատակազմը մասնակցել է վերապատրաստում-աշխատաժողովի՝ ԵՄ «Աջակցություն Հայաստանում արդարադատության ոլորտի բարեփոխումներին» և «Թիրախային տեխնիկական օժանդակություն Հայաստանում արդարադատության ոլորտի բարեփոխումներին աջակցելու համար» ծրագրերի շրջանակներում:
Աշխատաժողովի նպատակն է բարելավել և կատարելագործել Արդարադատության նախարարության բարձրաստիճան անձնակազմի ընդհանուր կառավարման և առաջնորդության հմտություններն ու կարողությունները, մասնավորեցված խնդիրների վերլուծության արդյունքում վեր հանել այդ խնդիրների լուծման կառավարչական եղանակներ ու մեթոդներ:
Ինտերակտիվ վերապատրաստման ծրագրի ընթացում ԱՆ ստորաբաժանումների ղեկավարներն ուսումնասիրել են կառավարման և առաջնորդության ոլորտի կարողությունների զարգացմանն ուղղված մի շարք տեսական ուղղություններ, անհատներին և թիմերին առաջնորդելու գործնական հմտություններ՝ ձևավորելով հաջողակ կառավարման միջոցով արդյունքի հասնելու թիմային տեսլական:
Վերապատրաստումները վարել են հասարակական գիտությունների թեկնածու, միջազգային որակավորումներ ունեցող Մարդկային ռեսուրսների մասնագետ և քոուչ, թրեյներ, խորհրդատու, «Cascade People & Business» ընկերության հիմնադիր և գլխավոր տնօրեն Արփի Կարապետյանը և «Humanizzed» կազմակերպության հիմնադիր, գործադիր տնօրեն, «Digitain» կազմակերպության ՄՌԿ և կորպորատիվ մշակույթի գծով տնօրեն Մարիա Կարապետյանը:
