Կատարողական վարույթում ծանուցման նոր կարգավորումներ, կատարողական ծախսերի հաշվարկման նոր համակարգ. Նախարարի տեղակալ Լևոն Բալյանը «Կատարողական վարույթի մասին» նախագիծը ներկայացրել է ԱԺ

Արդարադատության նախարարի տեղակալ Լևոն Բալյանն ԱԺ պետական-իրավական հարցերի մշտական հանձնաժողովին է ներկայացրել «Կատարողական վարույթի մասին» նոր օրենքի և շուրջ 30 հարակից օրենքների նախագծերի փաթեթը:
Նախագծերի փաթեթի նպատակը՝ միասնական իրավաբանական հասկացությունների կիրառմամբ, առավել պարզ կարգավորումների սահմանումն է, արդյունքում՝ կատարողական վարույթի մասնակիցների և շահագրգիռ անձանց իրավունքների պաշտպանության արդյունավետ ու համապարփակ գործիքակազմի ներդնումը և հարկադիր կատարման արդյունավետ համակարգի համար անհրաժեշտ իրավական հիմքերի սահմանումը։
Նախագծով նախատեսվում է՝
1. Ներդնել կատարողական ծախսերի հաշվարկման նոր համակարգ։ Եթե ներկայում, օրինակ, դրամական պարտավորություններով մշտապես հաշվարկվում է 5 տոկոս կատարողական ծախս՝ անկախ փաստացի կատարված գործողություններից, ապա նախագծով նախատեսվում է, որ, եթե վարույթը հարուցելուց հետո 2 շաբաթվա ընթացքում քաղաքացին կամովին վճարի գումարը, ապա կգանձվի ընդամենը 2 տոկոսի չափով կատարողական վճար։
2. Ներդնել նոր մեխանիզմ, որի համաձայն՝ եթե երկու կողմերը համաձայն են, կարող են փոխադարձ համաձայնությամբ տարաժամկետել, հետաձգել պարտավորության կատարումը, փոխել կատարման կարգը կամ եղանակը։ Նախկինում դա միայն դատարանի առանձին որոշմամբ էր հնարավոր, ինչը քաղաքացուց լրացուցիչ ծախս և հավելյալ ժամանակ էր պահանջում:
3. Վարույթ ունեցող քաղաքացին այսուհետ որոշ դեպքերում կկարողանա կառավարել արգելադրված գույքը՝ վարձակալության հանձնել կամ ինքնուրույն, աճուրդից դուրս վաճառել՝ վարձավճարն ու վաճառքի գինը վճարելով ԴԱՀԿ։ Այսպես վարույթ ունեցող քաղաքացին շանս կունենա ինքնուրույն մարելու պարտքը:
4. Ներդնել ամբողջությամբ նորարարական և հավակնոտ գաղափար՝ հրաժարվել կատարողական թերթի հնացած ինստիտուտից՝ դատարանին և քաղաքացուն ազատելով բովանդակային բեռ չունեցող կատարողական թերթի տրամադրման փուլից:
5. Ներդնել կատարողական վարույթի շրջանակում ֆիզիկական և իրավաբանական անձանց էլեկտրոնային ծանուցման համակարգ, որով կատարողական վարույթների անձնական գրասենյակում գրանցված քաղաքացիներն իրենց համաձայնությամբ վարույթի մասին կծանուցվեն գրասենյակի և դրան կցված էլեկտրոնային փոստի միջոցով՝ ամբողջությամբ էլեկտրոնային եղանակով, իրավաբանական անձանց, պետական մարմինների ծանուցումն էլ կիրականացվի ամբողջությամբ էլեկտրոնային:
Այսպիսով, նախագծերի ընդունումը հնարավորություն կտա նոր որակ հաղորդել հարկադիր կատարմանը, ներդնել կանխատեսելի, հստակ կարգավորումներ, բարձրացնել կատարման արդյունավետությունը, ապահովել շահագրգիռ անձանց իրավունքների պաշտպանության համապարփակ գործիքակազմ՝ արդյունքում ներդնելով անհրաժեշտ իրավական հիմքեր՝ ունենալու հարկադիր կատարման այնպիսի համակարգ, որին քաղաքացին իսկապես կվստահի։