ՔԿՀ-ներում առողջապահության բարելավում, կանանց և երեխաների իրավունքների պաշտպանություն․ ԵԽ-ն բարձր է գնահատել Արդարադատության նախարարության հետ համագործակցությունը

Արդարադատության նախարարի տեղակալներ Լևոն Բալյանը և Կարեն Կարապետյանը մասնակցել են Արտաքին գործերի նախարարությունում կայացած Հայաստան-Եվրոպայի խորհուրդ 2023-2026թթ. Գործողությունների ծրագրի և Գործընկերություն հանուն լավ կառավարման ԵԽ-ԵՄ համատեղ նախաձեռնության 2023-2027թթ. Հայաստանի ծրագրի միջգերատեսչական կոմիտեների նիստերին:
 
Նիստերի ընթացքում ամփոփվել են նախորդ տարի մեկնարկած Հայաստան-Եվրոպայի խորհուրդ 2023-2026թթ. Գործողությունների ծրագրի և ԵԽ-ԵՄ Գործընկերություն հանուն լավ կառավարման 2023-2027թթ. Հայաստանի ծրագրի կատարման ընթացքը, դրական արդյունքներ են արձանագրվել դատաիրավական համակարգի, արդարադատության արդյունավետության բարձրացման, կոռուպցիայի, կիբերհանցագործությունների դեմ պայքարի, կենսաբժշկության, քրեակատարողական հիմնարկներում առողջապահության բարելավման, պրոբացիոն համակարգի զարգացման, կանանց, երեխաների իրավունքների պաշտպանության ոլորտներում:
 
Անդրադարձ է կատարվել նաև կենսաբժշկության ոլորտում մարդու իրավունքների պաշտպանության ծրագրի իրականացման մանրամասներին: Քննարկվել են նաև խտրականության արգելքի երաշխավորմանն առնչվող հարցերը. ներկայացվել են ազգային փոքրամասնությունների իրավունքների պաշտպանության, խտրականության դեմ պայքարի օրեսնդրության մշակման, ատելության խոսքի և ատելության շարժառիթով կատարվող հանցանքների կանխարգելման ուղղությամբ իրականացվող աշխատանքները։
 
ՀՀ ներկայացուցիչները և Եվրոպայի խորհրդի գործընկերները կարևորել են կոռուպցիայի դեմ պայքարի ոլորտում առկա համագործակցությունը և այն ընդլայնելու պատրաստակամություն հայտնել, մասնավորապես՝ 2023-2026 թվականների հակակոռուպցիոն ռազմավարության և դրանից բխող գործողությունների ծրագրի իրականացման շրջանակներում: Եվրոպական կողմը բարձր է գնահատել Արդարադատության նախարարության հետ համագործակցությունն ու պատրաստակամություն հայտնել շարունակել արդյունավետ գործընկերությունը։
 
Միջոցառումը համանախագահել են ՀՀ արտաքին գործերի նախարարի տեղակալ Պարույր Հովհաննիսյանն ու ԵԽ Ծրագրերի համակարգման տնօրեն Կլաուս Նոյկիրխը։