Հաշտարարության զարգացման միջոցառումների շրջանակում գործող հաշտարարները վերապատրաստվել են, 24 մասնակից ավարտել է որակավորման դասընթացը

17/06/2024

Արդարադատության նախարարության, Ասիական զարգացման բանկի, ՄԱԿ-ի զարգացման ծրագրի և Երևանում Եվրոպայի խորհրդի գրասենյակի համագործակցությամբ՝ անցկացվել է հաշտարարների որակավորման նպատակով իրականացվող ուսուցման երրորդ դասընթացը։ 2022թ. իրականացված օրենսդրական բարեփոխումներից հետո կազմակերպվող ուսուցման երրորդ դասընթացին մասնակցության հայտ էր ներկայացել ավելի քան 50 հավակնորդ, որոնցից 24-ը հնարավորություն էր ստացել մասնակցել միջազգային փորձագետ-հաշտարարների կողմից մշակված 33 ակադեմիական ժամ տևողությամբ դասընթացին:
Դասընթացն ավելի օգտակար դարձնելու նպատակով հրավիրյալ միջազգային և ազգային փորձագետներն ու դատավորները կիսվել են հաշտարարության ոլորտում իրենց արժեքավոր փորձով և օրենսդրական նոր կարգավորումների վերաբերյալ դիտարկումներով։ Դասընթացը հաջողությամբ ավարտած մասնակիցներին ողջունել են և ավարտական վկայականներ շնորհել Արդարադատության նախարարության «Օրենսդրության զարգացման կենտրոն» հիմնադրամի տնօրեն Տիգրան Դադունցը, Ասիական զարգացման բանկի Հայաստանյան մշտական առաքելության ներդրումային ծրագրերի ավագ մասնագետ Նարինե Ավետիսյանը, Եվրոպայի խորհրդի «Աջակցություն դատաիրավական բարեփոխումների իրականացմանը Հայաստանում» ծրագրի ազգային համակարգող Արման Զրվանդյանը, ՄԱԿ-ի զարգացման ծրագրի Սահմանադրական բարեփոխումների ծրագրի պատասխանատու Աննա Հակոբյանը և «Արբիտրաժի և հաշտարարության հայաստանյան կենտրոնի» տնօրեն Տաթևիկ Մատինյանը։
Տիգրան Դադունցը շնորհակալություն է հայտնել գործընկերներին՝ կարևոր դասընթացի կազմակերպմանն աջակցելու համար՝ նշելով, որ հաշտարարության նկատմամբ հետաքրքրվածությունը գնալով մեծանում է, և ամուր հիմքեր են ստեղծվում Հայաստանում հաշտարարության զարգացման համար: Տիգրան Դադունցը շեշտել է նաև ոլորտի զարգացման կարևորությունը նախարարության տեսանկյունից, ինչին էլ միտված են ներդրվող մեծ ջանքերը և ռեսուրսները՝ բարեփոխումները իրականացնել միջազգային լավագույն փորձին և չափանիշներին համապատասխան: Շարունակական դասընթացների և բարեփոխումների շնորհիվ 2024թ. առաջին կիսամյակի ավարտին հաշտարարական համայնքը կունենա շուրջ 85 հաշտարար։
Արդարադատության նախարարության և «Արբիտրաժի և հաշտարարության հայաստանյան կենտրոնի» համագործակցությամբ տեղի է ունեցել նաև գործող հաշտարարների վերապատրաստման դասընթաց-աշխատաժողովը՝ միտված նորագույն փորձի և մեթոդների փոխանակմանը: Գործող հաշտարարների վերապատրաստման դասընթաց-աշխատաժողովի համար հյուրընկալվել էր իտալացի, երկար տարիների փորձ ունեցող հաշտարար Կորրադո Մորային, ով կիսվեց հաշտարարության ոլորտի վերջին զարգացումներով և իր պրակտիկ փորձով: Հաշտարարության գործընթացն առավել հասանելի և համակարգված կազմակերպելու նպատակով ավարտին են մոտենում e-mediation.am հաշտարարության էլեկտրոնային հարթակի ստեղծման աշխատանքները։ Հարթակը հնարավորություն կտա առցանց եղանակով համակարգել ողջ գործընթացը։