Տեղի է ունեցել հաշտարարության ոլորտի բարեփոխումների քննարկմանը վերաբերող աշխատաժողով
28/03/2025
Արդարադատության նախարարի տեղակալ Տիգրան Դադունցի համակարգմամբ տեղի է ունեցել դատավորների և արտոնագրված հաշտարարների մասնակցությամբ աշխատաժողով, որն ուղղված էր պարտադիր հաշտարարության ներդրման քայլերի նախագծմանը և հաշտարարության ոլորտի այլ բարեփոխումների քննարկմանը։
Տիգրան Դադունցը կարևորել է այս բարեփոխման կայացման գործում բոլոր դերակատարների՝ գլխավորապես՝ դատավորների, հաշտարարների, փաստաբանների և Արդարադատության նախարարության ակտիվ համագործակցությունը, դատական համակարգի պրո-հաշտարարական մոտեցման խթանումը: Աշխատաժողովին մասնակցել են Երևան քաղաքի և մարզերի ընդհանուր իրավասության դատարանների այն դատավորները, որոնք իրենց վարույթներում առնչություն են ունենում ընտանեկան վեճերով, աշխատանքային վեճերով, ինչպես նաև արտոնագրված հաշտարարի մասնակցությամբ արտադատական կարգով կնքված հաշտության համաձայնությունը հաստատելու վերաբերյալ դիմումներով դատական գործերի հետ:
Ներկայացվել են էլեկտրոնային հաշտարարության համակարգի կիրառման առանձնահատկությունները: Ներկաները քննարկել են պրակտիկայում առաջացող մարտահրավերները հաղթահարելու ուղիները:
