Մեկնարկել է «Խտրականության, ատելության խոսքի և ատելության շարժառիթով հանցագործությունների քննության առանձնահատկությունները» թեմայով երկօրյա աշխատաժողովը

Կայացել է քննիչների, դատախազների և ոստիկանության ծառայողների համար խտրականության, ատելության խոսքի և ատելության շարժառիթով հանցագործությունների քննության ուղեցույցների շնորհանդեսը Մարտի 28-ին մեկնարկել է «Խտրականության, ատելության խոսքի և ատելության շարժառիթով հանցագործությունների քննության առանձնահատկությունները» թեմայով երկօրյա աշխատաժողովը՝ միտված ոստիկանների, քննիչների և դատախազների կարողությունների զարգացմանը, որի շրջանակներում ներկայացվել է նաև խտրականության, ատելության խոսքի և ատելության շարժառիթով հանցագործությունների քննության ուղեցույցը: Աշխատաժողովի բացմանը Արդարադատության նախարարի տեղակալ Աննա Կարապետյանը, ողջունելով մասնակիցներին, շնորհակալություն է հայտնել ՄԱԶԾ գործընկերներին և ներգրավված փորձագետին՝ աշխատաժողովի կազմակերպման, ինչպես նաև դրան նախորդած՝ կարիքների գնահատմանը ուղղված մասնագիտական քննարկումների ու վերապատրաստումների կազմակերպման համար։ Աննա Կարապետյանը անդրադարձել է մարդու իրավունքների պաշտպանության և խտրականության դեմ պայքարի ոլորտում Արդարադատության նախարարության ռազմավարական առաջնահերթություններին և դրանց շրջանակներում իրականացված քայլերին ինչպես օրենսդրական փոփոխությունների, այնպես էլ իրավակիրառ մարմինների կարողությունների զարգացման և իրազեկման աշխատանքների համատեքստում։ Նախարարի տեղակալը կարևորել է Արդարադատության նախարարության հետ համագործակցությամբ քննիչների, դատախազների և ոստիկանության ծառայողների համար խտրականության, ատելության խոսքի և ատելության շարժառիթով հանցագործությունների քննության ուղեցույցների մշակումը որպես գործնական ձեռնարկ, որը կաջակցի վերջիններիս գործերի քննության ընթացքում:

Դասընթացի ընթացքում մասնակիցներին ներկայացվել են խտրականության և ատելության խոսքի ընդհանուր բնութագիրը, ատելության շարժառիթով կատարվող հանցագործությունները և դրանց քննության առանձնահատկությունները։ Աշխատաժողովի երկրորդ օրը նվիրված կլինի ատելության շարժառիթով կատարված հանցանքների քննության ընթացքում շարժառիթի (bias motivation) առկայության գնահատման չափանիշների վերաբերյալ ՄԻԵԴ նախադեպային պրակտիկային։

Աշխատաժողովից հետո ուղեցույցները կտարածվեն իրավասու մարմինների աշխատակիցների շրջանում՝ իրավակիրառ պրակտիկայում օգտագործելու նպատակով։

Աշխատաժողովը կայացել է Եվրոպական միության կողմից ֆինանսավորվող և ՄԱԶԾ-ի, ՅՈՒՆԻՍԵՖ-ի, ՄԱԿ-ի բնակչության հիմնադրամի կողմից իրականացվող «Մարդու իրավունքների պաշտպանության խթանում և ազգային հաստատությունների հզորացում» ծրագրի աջակցությամբ։