«Հարսնաքարում» ծեծվածը նախարարի հարեւանն է

Հասարակության ուշադրության կենտրոնում գտնվող «Հարսնաքարի» միջադեպի գործը առաջիկայում' նախաքննությունից հետո, կտեղափոխվի դատարան: Հայաստանյան իրականության մեջ ոչ միշտ եւ ոչ բոլորի դեպքում է արդարադատությունն իրագործվում' արտոնյալներ կան: Օրինակ' մոտ մեկ տարի առաջ նույն ՀՀԿ-ական պատգամավոր Ռուբեն Հայրապետյանը հեռախոսով հայհոյեց լրագրողին, եւ թե դատախազությունը, թե դատական բոլոր ատյանները գտան, որ կատարվածի մեջ հանցակազմ չկա: ԱԺ-ում կառավարության ծրագրի քննարկման ժամանակ արդարադատության նախարարին մի քանի հարց ուղղեցինք' հետաքրքրվելով, թե երաշխավորու՞մ է «Հարսնաքարի» գործով արդարադատության իրագործումը: Պարզվում է' «Հարսանքարի» միջադեպից տուժած Արտակ Բայադյանը արդարադատության նախարար Հրայր Թովմասյանի հարեւանն է:

- Պարո՛ն Թովմասյան, որպես արդարադատության նախարար ի՞նչ եք անելու, որ «Հարսնաքարի» գործով խնդիրը արդար լուծում ունենա դատարանում, քանի որ օրինակ, երբ նույն Ռուբեն Հայրապետյանը հայհոյեց լրագրողին, ՀՀ դատարանն ու դատախազությունը գտան, որ այդտեղ հանցակազմ չկա: Այս պարագայում կարծում եք ՀՀ դատարանը ի զորու կլինի՞ ճիշտ վճիռ կայացնելու:

- Եթե ես ունեմ մի բնակարան, էդ բնակարանը տվել եմ վարձով եւ էնտեղ ինչ-որ բան է տեղի ունենում, դա չի նշանակում, որ ես եմ դրա համար պատասխանատու միայն: Կա Ռուբեն Հայրապետյանի հայտարարությունը, եւ ես առիթ չունեմ էս դեպքում չհավատալու: Կան ձերբակալվածներ, քննությունն ընթանում է, եւ հուսով եմ, որ հասարականության որոշ շրջանի մոտ առկա «անպատասխանատվության մթնոլորտ» հասկացողությունը վերանալու է: Եւ այս առաջին քայլերը խոսում են հենց դրա մասին: Որպես արդարադատության նախարար՝ ուղղակի հիշեցնում եմ, որ մենք ունենք անկախ դատական իշխանություն եւ արդարադատության նախարարը չի որոշում, թե նրանք ինչ պիտի անեն: Ընդհանուր հսկողական մեխանիզմներով, ինչպես մյուս գործերով, այս գործով դատաքննության ժամանակ եւս կհետեւենք, թե արդյո՞ք թույլ են տրվում խախտումներ, թե թույլ չեն տրվում:

- Դուք ասում եք, որ հավատում եք Ռուբեն Հայրապետյանի հայտարարությանը, մինչդեռ նույն գործով տուժողները վկայում են, որ 10-15 հոգի են եղել ծեծողները:

- Տուժողներից մեկը' Արտակը, իմ անմիջական' ներքեւի բնակարանի հարեւանն է, եւ ես այդ բոլոր մանրամասներին ծանոթ եմ:

- Տեսակցե՞լ եք Արտակին:

- Չեմ տեսակցել, ծնողների հետ եմ 2-3 անգամ զրուցել: Այսինքն' միջադեպին ծանոթ եմ պատմածով, բայց իմ ֆունկցիաներից դուրս է. ես որպես մարդ կարող եմ գնահատական տալ, խոսել, բայց որպես արդարադատության նախարար իմ ֆունկցիաներից դուրս է այդ մասին խոսելը:

- Ի վերջո, այս դեպքում արդարադատություն կիրականացվի՞: Կարո՞ղ եք երաշխավորել դա: Այսօր ԱԺ ամբիոնից վարչապետն էլ ասաց, որ արդարադատության նկատմամբ հասարակության վստահությունը պակաս է:

- Ես կարող եմ երաշխավորել այնքանով, որքանով դատական իշխանությունը գործում է անկախ։ Մեր օրենսդրությունով սա հստակ ու որոշակի է: Եթե այս գործում եւ ցանկացած գործում դատավորների կողմից թույլ տրվեն խախտումներ, այդ դեպքում գործադիրն իր լծակները կօգտագործի:

- Պարո՛ն Թովմասյան, այսօր քննարկվում է կառավարության ծրագիրը, եւ կառավարությունը չունի քաղաքական ուժերի' ԲՀԿ-ի, ՀԱԿ-ի, ՀՅԴ-ի, Ժառանգության վստահությունը։ Կառավարությունը կկարողանա՞ իրագործել ծրագրային խոստումները:

- Իրենք բոլորով փոքրամասնություն են: Կառավարությունն ունի մեծամասնության աջակցությունը: Եթե դուք 50 անուն թվարկեք, եւ էտ 50-ը միասին փոքրամասնություն լինեն, ուրեմն իրենք փոքրամասնություն են, այսինքն' բոլոր նրանք, ովքեր այսօր չեն պաշտպանում: Քվեարկությունը ցույց կտա' ունի՞ մեծամասնություն, թե չունի:

-Մեծամասնության խնդիրը չէ, պարո՛ն նախարար, քաղաքական ուժերի աջակցության խնդիրն է:

- Կարող է իշխանությունը լինել մեկը, իսկ ընդդիմությունը՝ 150-ը, բայց այդ ընդդիմությունը լինի փոքրամասնություն: Եթե բոլորի աջակցությունը լիներ, ընդդիմություն չէր լինի երկրում:

- Կառավարության ծրագիրը կիրականացվի՞ այս դեպքում:

- Եթե Կառավարության ծրագիրը չիրականացվի, Կառավարությունը հրաժարական կտա:

- Պարո՛ն Թովմասյան, 2008-2012 թթ Կառավարության ծրագիրն էլ չիրականացվեց, բայց Կառավարությունը հրաժարական չտվեց:

- Հստակ նշվեց, թե պատճառները որոնք ենք: Դրանով հանդերձ ստացավ մեծամասնություն: Սա է քաղաքական եւ իրավական պրոցեսը: