ՄԱԿ-ի Երեխայի իրավունքների կոմիտեի 63-րդ նստաշրջանում ներկայացվել է Հայաստանի պարբերական զեկույցը
03/06/2013
Մայիսի 29-ին և 30-ին Ժնևում ՄԱԿ-ի Երեխայի իրավունքների կոմիտեի 63-րդ նստաշրջանում քննարկվել է Հայաստանի 3-րդ և 4-րդ պարբերական զեկույցը: Այն վերաբերել է ՄԱԿ-ի Երեխայի իրավունքների մասին կոնվենցիային, ինչպես նաև Երեխայի իրավունքների մասին կոնվենցիային կից զինված հակամարտություններին երեխաների մասնակցության, երեխաների մարմնավաճառության և մանկական պոռնոգրաֆիայի մասին կամընտիր արձանագրությունների դրույթների կատարմանը:
ՀՀ արդարադատության նախարարի տեղակալ, հայաստանյան պատվիրակության ղեկավար Եղիշե Կիրակոսյանը ներկայացրել է զեկույցը, մասնավորապես անդրադառնալով ՄԱԿ-ի երեխայի իրավունքների մասին կոնվենցիայով և կից արձանագրություններով ՀՀ ստանձնած պարտավորությունների կատարման ընթացքին` օրենսդրական և պրակտիկայում արձանագրված բարեփոխումներին, ինչպես նաև Հայաստանի Հանրապետության ձեռնարկած և նախատեսվող քայլերին:
Զեկույցի քննարկման ընթացքում Հայաստանի պատվիրակությունը ներկայացրել է երեխայի իրավունքների պաշտպանության ռազմավարական ծրագիրը, նախորդ ռազմավարության և գործողությունների ծրագրի իրականացման արդյունքները, ինչպես նաև ՀՀ կառավարության ներկայացրած մի շարք օրենքների նախագծերը՝ ուղղված Կոնվենցիայի և երկու կամընտիր արձանագրությունների դրույթների կատարմանը:
Քննարկվել են նաև երեխաների ու հաշմանդամություն ունեցող երեխաների խնամքին, սոցիալական ապահովությանը, մինչծննդյան և հետծննդյան ժամանակահատվածում երեխայի մորը և երեխային տրամադրվող առողջապահական ծառայություններին ու անչափահասների արդարադատության ոլորտին, ինչպես նաև երեխայի մասնակցությամբ զինված ընդհարումներին, մանկավաճառության, մանկական պոռնոգրաֆիայի և մանկական մարմնավաճառության կանխմանն առնչվող հարցեր:
Կոմիտեն ողջունել է Հայաստանի Հանրապետության կողմից Կոնվենցիայի և երկու կամընտիր արձանագրությունների կատարման ուղղությամբ ձեռնարկած քայլերը և հորդորել շարունակել ստանձնած պարտավորությունների կատարումը:
Զեկույցի քննարկումից հետո ընդունվել են կոմիտեի եզրակացություններն ու առաջարկությունները:
Հայաստանյան պատվիրակության կազմում ընդգրկված են եղել նաև ՀՀ Ազգային ժողովի աշխատակազմի, ՀՀ արտաքին գործերի, Աշխատանքի և սոցիալան հարցերի, Կրթության և գիտության, Պաշտպանության նախարարությունների ու ՀՀ ոստիկանության ներկայացուցիչներ:
ՄԱԿ-ի Երեխայի իրավունքների կոմիտեն 18 անկախ փորձագետներից կազմված ՄԱԿ-ի պայմանագրային մարմին է, որը 5 տարի պարբերականությամբ ներկայացվող զեկույցների միջոցով հսկում է ՄԱԿ-ի «Երեխայի իրավունքների մասին» կոնվենցիայի և կից կամընտիր արձանագրությունների կատարման ընթացքը:
