Քննարկում` արդարադատության ոլորտի ներկայացուցիչների մասնակցությամբ
25/06/2013
Հունիսի 25-ին ՀՀ արդարադատության նախարարությունում անցկացվեց «Ինստիտուցիոնալ համակարգի ընթացակարգեր, ՏՏ լուծումներ և ձևանմուշների մշակում, արդիականացված դատական վիճակագրության հրապարակում» թեմայով սեմինար քննարկումը:
Ծրագրի խորհրդատուն ՀՀ արդարադատության նախարարության և դատական դեպարտամենտի աշխատակիցներին ներկայացրեց վիճակագրական տվյալների էլեկտրոնային շտեմարանի նախնական տարբերակը: Համակարգը, որն իրականացվում է Համաշխարհային բանկի ծրագրի շրջանակներում, պարունակում է վիճակագրական տեղեկություններ իրավաբանական անձանց պետական ռեգիստրի, քաղաքացիական կացության ակտերի գրանցումների, դատական համակարգի և դատական ակտերի հարկադիր կատարման վերաբերյալ:
ՀՀ արդարադատության նախարարի տեղակալ Արամ Օրբելյանի խոսքով էլեկտրոնային շտեմարանը յուրահատուկ գործիք է լինելու հավաքված տվյալները ամփոփելու և վերլուծելու համար:
Էլեկտրոնային համակարգի ստեղծման աշխատանքային խմբի ղեկավար Գեորգի Խաչատրյանը ներկայացրեց համակարգի մշակման փուլերը՝ նշելով, որ նախ մշակել են վիճակագրական չափանիշները, դրանց վերլուծության մեթոդաբանությունը, ապա ստեղծել են էլեկտրոնային տվյալների շտեմարանը: Աշխատանքային խումբն ուսումնասիրել է միջազգային փորձը, էլեկտրոնային շտեմարանի հնարավոր մոդելներն ու կազմել առաջարկությունների փաթեթ:
Համակարգը փորձարկելուց, ապա նաև վերջնական գործարկելուց հետո շտեմարանը հասանելի կդառնա նաև լայն հանրությանը:
Տեղեկությունները, բացառությամբ անհատական տվյալների, ինքնաշխատ կերպով հավաքագրելու են արդեն գործող և հետագայում պատրաստվելիք էլեկտրոնային համակարգերից :
