ՀՀ ԱՆ առաջին տեղակալ Գրիգոր Մուրադյանն ընդունել է Սերբիայի արդարադատության նախարարության պետքարտուղար Նիկոլիչ Դանիլոյին
02/07/2013
ՀՀ արդարադատության նախարարի առաջին տեղակալ Գրիգոր Մուրադյանն այսօր ընդունել է Սերբիայի արդարադատության նախարարության պետքարտուղար Նիկոլիչ Դանիլոյին, ով Հայաստան է ժամանել Եվրախորհրդի նախարարների կոմիտեում ՀՀ նախագահության շրջանակներում անցկացվող երևանյան համաեվրոպական խորհրդաժողովին մասնակցելու նպատակով:
ՀՀ արդարադատության նախարարի առաջին տեղակալի հետ հանդիպման ընթացքում նախ կողմերը ներկայացրել են արդարադատության ոլորտում իրականացվող բարեփոխումները, նշել ընդհանրություններն ու տարբերությունները:
Գրիգոր Մուրադյանը որոշ մանրամասներ է փոխանցել ՀՀ իրավական և դատական բարեփոխումների 2012-2016 թվականների ռազմավարական ծրագրի վերաբերյալ, նշելով, որ բավականին հավակնոտ ծրագրի նպատակն է համակարգային մոտեցմամբ զուգահեռաբար փոփոխություններ կատարել բոլոր ուղղություններով:
Սերբիայի արդարադատության նախարարության պետքարտուղարն էլ իրենց փորձը փոխանցելու պատրաստակամություն է հայտնել, նշելով, որ իրենք Հայաստանն ընկալում են, որպես բարեկամ երկիր և պատրաստ են համագործակցել բոլոր բնագավառներում:
Գրիգոր Մուրադյանը շնորհակալություն է հայտնել բովանդակալից զրույցի համար, ապա նաև հույս հայտնել, որ ակնկալվող համագործակցությունը արդյունավետ կլինի երկու կողմի համար:
Հանդիպմանը մասնակցել են նաև ՀՀ արդարադատության նախարարի տեղակալ Եղիշե Կիրակոսյանը, Սերբիայի արդարադատության նախարարության ներկայացուցիչ Բիլյանա Պավլովիչը, ՀՀ-ում Սերբիայի արտակարգ և լիազոր դեսպան Դրագան Ժուպանյեվացը:
