Քննարկում «Հասարակական կազմակերպությունների մասին» նոր օրենքի նախագծի շուրջ
07/03/2014
![](/storage/files/news/news_9445866564771__.jpeg)
Մարտի 7-ին անցկացվեց «Հասարակական կազմակերպությունների մասին» նոր օրենքի նախագծի ընդլայնված քննարկումը, որը նախաձեռնել էր Մարդկային զարգացման միջազգային կենտրոնը ԱՄՆ ՄԶԿ աջակցությամբ «Քաունթերփարթ ինթերնեյշնալ» կազմակերպության ծրագրի շրջանակներում:
Քննարկմանը մասնակցում էին ՀՀ արդարադատության նախարարի տեղակալ Արամ Օրբելյանը, ինչպես նաև երեք տասնյակից ավելի հասարակական կազմակերպությունների ներկայացուցիչներ:
Փոխնախարար Արամ Օրբելյանը բացման խոսքում ներկայացրեց այն հիմնական խնդիրները, որոնք նախատեսվում է կարգավորել առաջարկվող նախագծով: Փոխնախարարի խոսքով` օրենքի նախագիծը կոչված է կարգավորելու հասարակական կազմակերպությունների գործունեության միջավայրը:
Քննարկման մասնակից ԱԺ պատգամավոր Թևան Պողոսյանի կարծիքով` նախագիծը հնարավորություն է ստեղծելու, որպեսզի «յուրաքանչյուր հասարակական կազմակերպություն ինքը կարողանա կարգավորել կազմակերպչական խնդիրները»:
Քննարկման մասնակիցները, գոհունակություն հայտնելով նախաձեռնության համար, այդուհանդերձ, որոշ առաջարկներ ներկայացրեցին, որոնք իրենց կարծիքով էլ ավելի կնպաստեն կարգավորել ոլորտը:
«Հասարակական կազմակերպությունների մասին» օրենքի նախագիծը մշակել են ՄԶՄԿ փորձագետները, ԱՄՆ ՄԶԿ աջակցությամբ, «Քաունթերփարթ ինթերնեյշնալ» կազմակերպության ծրագրի շրջանակներում:
Քննարկման ավարտին որոշվեց՝ բոլոր առաջարկությունները գրավոր ներկայացնել կազմակերպիչներին: