Հայաստանի Հանրապետության արդարադատության նախարարի 2021 թվականի հունիսի 1-ի N 43-Ա որոշում

ՈՐՈՇՈՒՄ N  43 -Ա

Կառավարչի որակավորումը դադարեցնելու մասին

01.06.2021թ.  ք. Երևան

ՀՀ արդարադատության նախարարի պաշտոնակատար Ռուստամ Բադասյանս՝ ուսումնասիրելով Աշոտ Խաչատրյանի՝ սնանկության գործերով կառավարչի որակավորումը դադարեցնելու վերաբերյալ հարուցված վարչական վարույթի նյութերը.

ՊԱՐԶԵՑԻ

1. 1.    Էական նշանակություն ունեցող փաստերը.

1.1.   ՀՀ արդարադատության նախարարությանն ուղղված 20.05.2021թ.-ի թիվ
Մ/29832-2021 դիմումով (այսուհետ՝ Դիմում) սնանկության գործերով կառավարիչ Աշոտ Խաչատրյանը (այսուհետ նաև՝ Դիմումատու) խնդրել է դադարեցնել իր՝ սնանկության գործերով կառավարչի որակավորումը:

1.2.  Դիմումի հիման վրա հարուցված վարչական վարույթի շրջանակներում 2021 թվականի մայիսի 31-ին նշանակվել են լսումներ, որի մասին Դիմումատուն պատշաճ ծանուցվել է:

1.3.   Կառավարիչը 31.05.2021թ.-ին նշանակված ժամին իր ներկայացուցչի՝ փաստաբան Կարեն Ղոնյանի հետ ներկայացել է ՀՀ արդարադատության նախարարության վերահսկողական ծառայություն:

1.4.   Լսումների ընթացքում Կառավարիչը և վերջինիս ներկայացուցիչը հայտնել են, որ Դիմումի վերաբերյալ լրացուցիչ բացատրություններ, միջնորդություններ և առարկություններ չունեն, պնդում են դիմումով ներկայացված խնդրանքը, այն է՝ դադարեցնել Աշոտ Խաչատրյանի՝ սնանկության գործերով կառավարչի որակավորումը:

1.5.   Վարչական վարույթի լսումների վերաբերյալ 31.05.2021թ. կազմվել է թիվ 1 արձանագրությունը՝ երկու օրինակից, որի մեկ օրինակը առձեռն հանձնվել է Կառավարչին:

1. 2.    Կիրառելի իրավական նորմերը. 

«Սնանկության մասին» օրենքի (այսուհետ՝ Օրենք) 29.2-րդ հոդվածի 1-ին մասի 1-ին կետի համաձայն՝ Հայաստանի Հանրապետության արդարադատության նախարարը դադարեցնում է կառավարչի որակավորումը, եթե` կառավարիչը դիմել է այդ մասին:

Նույն հոդվածի 2-րդ մասի 1-ին կետի համաձայն՝ կառավարչի որակավորումը դադարեցվում է` սույն հոդվածի 1-ին մասի 1-ին և 5-16-րդ կետերով նախատեսված դեպքերում որակավորումը դադարեցնելու մասին որոշումն ուժի մեջ մտնելու օրվանից: 

1. 3.   Իրավական վերլուծությունները և եզրահանգումը.

Վերոշարադրյալ իրավանորմերի մեկնաբանումից պարզ է դառնում, որ, ի թիվս այլ հիմքերի, կառավարչի որակավորումը դադարեցվում է նաև այդ մասին վերջինիս կողմից դիմում ներկայացնելու հիմքով:

Կառավարչի կողմից ներկայացված  դիմումի հիման վրա վերջինիս որակավորումը դադարեցվում է Հայաստանի Հանրապետության արդարադատության նախարարի որոշմամբ, որի ուժի մեջ մտնելու օրվանից որակավորումը համարվում է դադարեցված:

Տվյալ պարագայում Դիմումատուն Հայաստանի Հանրապետության արդարադատության նախարարություն ներկայացված դիմումով խնդրել է դադարեցնել իր՝ սնանկության գործերով կառավարչի որակավորումը, ինչպես նաև դիմումի հիման վրա հարուցված վարչական վարույթի շրջանակներում նշանակված լսումներին ներկայանալով՝ հայտնել է, որ դիմումի վերաբերյալ լրացուցիչ բացատրություններ, միջնորդություններ և առարկություններ չունի, պնդում է դիմումով ներկայացված խնդրանքը, այն է՝ դադարեցնել Աշոտ Խաչատրյանի՝ սնանկության գործերով կառավարչի որակավորումը:

Նշվածի արդյունքում գտնում եմ, որ առկա է «Սնանկության մասին» օրենքի 29.2-րդ հոդվածի 1-ին մասի 1-ին կետով նախատեսված հիմքը՝ սնանկության գործով կառավարիչ Աշոտ Խաչատրյանի որակավորումը դադարեցնելու համար:

Ելնելով վերոգրյալից և ղեկավարվելով «Սնանկության մասին» օրենքի 29.2-րդ հոդվածի 1-ին մասի 1-ին կետով և նույն հոդվածի 2-րդ մասի 1-ին կետով.

ՈՐՈՇԵՑԻ

1. Սնանկության գործերով կառավարիչ Աշոտ Խաչատրյանի (որակավորման վկայականի համարը՝ 20121102-00035, անհատ ձեռնարկատիրոջ պետական հաշվառման համարը՝ 290.08518, գործունեության վայրի հասցեն՝ Ք. Երևան, Նոր-Արեշ, 41 փ., 43 տ., ծանուցման հասցեն՝ Ք. Երևան, Նոր-Արեշ, 41 փ., 43 տ.) որակավորումը դադարեցնել:

2. Սույն որոշումն ուժի մեջ է մտնում սնանկության գործերով կառավարիչ Աշոտ Խաչատրյանին այն հանձնելուն հաջորդող օրվանից և կարող է բողոքարկվել դատական կարգով՝ ուժի մեջ մտնելու պահից երկամսյա ժամկետում: