Տեղի է ունեցել հայ-իրանական իրավական ոլորտի կոմիտեի առաջին նիստը. Եռօրյա այցով Հայաստանում է գտնվում Իրանի արդարադատության նախարարության բարձրաստիճան պատվիրակությունը

19/09/2023

Արդարադատության նախարար Գրիգոր Մինասյանն այսօր ընդունել է եռօրյա այցով Հայաստանի Հանրապետություն ժամանած՝ Իրանի Իսլամական Հանրապետության արդարադատության նախարարության պատվիրակությանը, որը գլխավորել է նախարարի տեղակալ Ասքար Ջալալիանը:
Նախարարը ողջունել է հյուրերին և հույս հայտնել, որ իրավական հարցերով կոմիտեի անդրանիկ նիստը կնպաստի հայ-իրանական համագործակցության ամրապնդմանը: Գրիգոր Մինասյանը նշել է, երկուստեք քայլերի անհրաժեշտությունը՝ Իրանի հետ առանձնահատուկ հարաբերությունների հետագա զարգացման համար: Իրանի արդարադատության նախարարի տեղակալը շնորհակալություն է հայտնել ջերմ ընդունելության և հագեցած օրակարգի համար:
Ասքար Ջալալիանը նշել է, որ մինչ օրս երկու երկրների արդարադատության նախարարություններն ունեցել են ամուր գործընկերային հարաբերություններ, ինչը նպաստել է ոլորտային արդյունավետ համագործակցությանը:
Գրիգոր Մինասյանն ու Ասքար Ջալալիանը քննարկել են դատապարտյալների փոխանցման ու հանցագործություն կատարած անձանց հանձնման (էքստրադիցիա) վերաբերյալ մի շարք հարցեր: Հանդիպմանը վերհանվել են ոլորտային խնդիրներն ու դրանց ուղղությամբ իրականացվելիք աշխատանքների ճանապարհային քարտեզը:
Գրիգոր Մինասյանի հետ հանդիպման ավարտից հետո՝ նախարարի տեղակալ Արմենուհի Հարությունյանի գլխավորությամբ կայացել է կոմիտեի անդրանիկ նիստը երկկողմ համաձայնագրերի կատարման ընթացքի և վեր հանված խնդիրների վերաբերյալ: