Հայաստանը վերահաստատել է համաշխարհային անվտանգությանն սպառնացող հանցագործությունների անպատժելիության դեմ պայքարելու հանձնառությունը. Հռոմի ստատուտի հետվավերացման գործընթացին նվիրված աշխատաժողով է անցկացվել

Արդարադատության նախարարի տեղակալ Արմենուհի Հարությունյանը մասնակցել է Միջազգային քրեական դատարանի նյութական և դատավարական իրավունքի ներկայացում ՀՀ պետական մարմինների հիմնական դերակատարների համար աշխատաժողովին: Նախարարի տեղակալը նշել է, որ 2023թ հոկտեմբերի 3-ին Հայաստանը վավերացրել է Միջազգային քրեական դատարանի Հռոմի կանոնադրությունը, որն ուժի մեջ է մտել 2024թ փետրվարի 1-ից:

Կանոնադրության վավերացմամբ՝ Հայաստանը վերահաստատել է հանձնառությունը՝ պայքարելու համաշխարհային խաղաղությանն ու անվտանգությանը սպառնացող ծանրագույն հանցագործությունների անպատժելիության դեմ: Այս որոշումն արտացոլում է ՀՀ նվիրվածությունը՝ մարդու իրավունքների պաշտպանության և օրինականության սկզբունքներին։

Հռոմի կանոնադրության վավերացման և հետվավերացման գործընթացներում նույնքան կարևոր նշանակություն ունի Արդարադատության նախարարության համագործակցությունը միջազգային գործընկերների հետ, մասնավորապես՝ Նիդերլանդների Թագավորության դեսպանատան հետ համագործակցության շրջանակներում մեկնարկած՝ «Աջակցություն Հայաստանի Հանրապետության կառավարությանը Միջազգային քրեական դատարանի Հռոմի կանոնադրության հետվավերացման գործընթացներում» խորագրով մեկամյա ծրագիրը։

Այս նախաձեռնությունը իրականացվում է վստահելի գործընկեր «Իրավունքի Եվրոպա» հասարակական կազմակերպության կողմից՝ ԱՆ նախարարության հետ համագործակցությամբ, ինչի շնորհիվ կազմակերպվել է նաև այս աշխատաժողովը, ինչպես նաև իրականացվում է իրավական ակտերի մշակում, իրազեկման գործընթացում աջակցություն նաև ոլորտի մասնագետների կարողությունների զարգացման աջակցություն: