Ամփոփվել է վարչական դատավարության էլեկտրոնային համակարգի վերապատրաստումների 1-ին փուլը

27/12/2024

Արդարադատության նախարարության կողմից ամփոփվել է վարչական դատավարության էլեկտրոնային համակարգի շահառուների վերապատրաստումների 1-ին փուլը, որին մասնակցել են վարչական մասնագիտացմամբ դատարանների գրասենյակների աշխատակիցները, Վարչական դատարանի, Վերաքննիչ վարչական դատարանի և ՀՀ վճռաբեկ դատարանի վարչական պալատի դատավորների օգնականներ, գործավարներ և նիստերի քարտուղարներ:
Արդարադատության նախարարի խորհրդական Լիանա Թովմասյանը համակարգի վերապատրաստման մասնակիցներին ներկայացնելով էլեկտրոնային համակարգը՝ հայտնել է, որ 2023 թ. հունիսին կնքված պայմանագրի շրջանակում արդեն իսկ մշակվել է վարչական դատավարության էլեկտրոնային համակարգը և նախարարությունը գտնվում է համակարգի պիլոտային գործարկման փուլում: Ափոփելով վերապատրաստումների 1-ի փուլը՝ նշվել է, որ նախարարությունը 2025 թ. հունվարին իրականացնելու է վարչական մասնագիտացմամբ դատավորների, փաստաբանների և պետական կառավարման մարմինների ներկայացուցիչների վերապատրաստումներ՝ միաժամանակ ապահովելով նաև համակարգի պիլոտային գործարկում հենց դատարաններում։
Վերապատրաստումների ընթացքում հավաքագրվել են վերապատրաստման մասնակիցների ընթացիկ առաջարկները՝ համակարգի վերջնական կարգաբերումների շրջանակում հասցեագրելու նպատակով:
Վարչական դատավարության էլեկտրոնային համակարգը նախատեսվում է ամբողջությամբ գործարկել 2025 թ. 1-ին կիսամյակում: