Արդարադատության նախարարության «Օրենսդրության զարգացման կենտրոն» հիմնադրամի կողմից մշակված «Իրավական ակտերի նախագծերի մշակման մեթոդական ձեռնարկ» գիրքը ներկայացվել է պետական մարմինների ներկայացուցիչներին

Արդարադատության նախարարության «Օրենսդրության զարգացման կենտրոն» հիմնադրամի կողմից կազմակերպվել է հանրային քննարկում, որին մասնակցել են նախարարությունների, Ազգային ժողովի, պետական անկախ մարմինների և ինքնավար մարմինների ներկայացուցիչներ։

Արդարադատության նախարարի տեղակալ և գրքի համահեղինակ Տիգրան Դադունցը քննարկմանը հանդես է եկել բացման խոսքով՝ նշելով, որ «Իրավական ակտերի նախագծերի մշակման մեթոդական ձեռնարկ» գրքի մշակման անհրաժեշտությունը բխում է իրավական ակտերի պատշաճ մշակման և միասնական մոտեցումների կիրառման կարևորությունից։ Նախարարի տեղակալը վստահություն է հայտնել, որ գիրքը կծառայի որպես իրավաստեղծ գործունեության մեջ ներգրավված իրավաբանների սեղանի գիրք՝ նպաստելով բոլոր պետական մարմինների կողմից միասնական չափանիշներով իրավական ակտերի մշակմանը և այդպիսով բարձրացնելով հայրենական իրավական դաշտի որակը:

Ձեռնարկի համահեղինակներ են նաև «Օրենսդրության զարգացման կենտրոն» հիմնադրամի տնօրեն Դավիթ Ղարիբյանը, Ներքին գործերի նախարարության Կրթահամալիրի գիտահետազոտական և նորարարությունների գծով աշխատանքները համակարգող պրոռեկտոր Էմիլ Մարգարյանը, Արբիտրաժի և հաշտարարության հայաստանյան կենտրոնի տնօրեն Լիլիթ Պետրոսյանը, «Օրենսդրության զարգացման կենտրոն» հիմնադրամի գրասենյակի ղեկավար Նունե Պեպանյանը և նույն հիմնադրամի իրավաբան-փորձագետ Մարիետտա Մնացականյանը:

Ելույթով հանդես են եկել նաև ձեռնարկի համահեղինակներ՝ Դավիթ Ղարիբյանը, Էմիլ Մարգարյանը և Լիլիթ Պետրոսյանը, ովքեր ներկայացրել են ձեռնարկի մշակման նախապատմությունը, դրա հիմնական մասերը և դրա մշակման մեթոդը՝ նշելով, որ ձեռնարկը կարևոր գործիք է իրավական ակտերի մշակման արդյունավետության և որակի բարձրացման համար և ներառում է իրավական ակտերի նախագծման բոլոր փուլերը, ինչպես նաև դրանց փոխկապակցված հարցերը։