Արդարադատության նախարարությունը մեկնարկել է դասընթացների շարք՝ աշխատակիցների կառավարման հմտությունների և ռազմավարական կարողությունների զարգացման նպատակով

22/05/2025

Եվրոպական միության կողմից ֆինանսավորվող «Աջակցություն Հայաստանում արդարադատության ոլորտի բարեփոխումների իրականացմանը» ծրագրի երկրորդ լրացուցիչ փուլի շրջանակում մեկնարկել է Արդարադատության նախարարության աշխատակազմի ներկայացուցիչների համար նախատեսված դասընթացների շարք՝ ուղղված ծրագրերի կառավարման հմտությունների և ռազմավարական կարողությունների զարգացմանը։
Նախաձեռնությունն իրականացվում է ՀՀ արդարադատության նախարարի տեղակալ Օկսաննա Աբրահամյանի նախաձեռնությամբ՝ նպատակ ունենալով ամրապնդել նախարարության ինստիտուցիոնալ կարողությունները և բարձրացնել աշխատակազմի մասնագիտական արդյունավետությունն արդարադատության ոլորտում ընթացող լայնածավալ բարեփոխումների շրջանակում։
Դասընթացների ընթացքում մասնակիցները կզարգացնեն իրենց բիզնես մտածողությունը, ռազմավարական պլանավորման կարողությունները, ինչպես նաև կծանոթանան ժամանակակից ծրագրային կառավարման գործիքներին ու մեթոդներին։ Այս քայլը կարևոր է արդարադատության համակարգի կայուն զարգացման, արդյունավետության բարձրացման և հասարակության նկատմամբ հաշվետու ու թափանցիկ կառավարման մշակույթի ձևավորման տեսանկյունից։
Ծրագիրը շարունակելու է ակտիվորեն աջակցել արդարադատության նախարարության կարողությունների հզորացմանը՝ ապահովելով բարեփոխումների հաջող և հետևողական իրականացումը։